Kithe Ishq Da Rog Na La Bethein Nusrat Fateh Ali Khan Kalam With Lyrics

Kithe Ishq Da Rog Na La Bethein

Ustad Nusrat Fateh Ali Khan

Poetry: Hafiz Muhammad Hussain 

 کتھے عشق دا روگ نہ لا بیٹھیں!!

استاد نصرت فتح علی خان 

شاعر: حافظ محمد حسین

عشق دے روگ دا کِتے نہ دارو عشق دے روگ اولّے

عقلاں شکلاں والے کیتے عشق نیں کملے جھلّے

رسوائیاں تے خواریاں باہجوں کج نئیں عشق دے پلّے

اوہ برباد ہوئے گھر حافظ! جو گھر عشق نیں ملّے

کِتے عشق دا روگ نہ لا بیٹھیں

جِند وختاں وچ نہ پا بیٹھیں

یاری عشق دے نال نہ لا بیٹھیں

ایہہ یار بنا کے لُٹ لیندا

ایہہ عشق اولڑا ڈاکو اے

بس نین ملا کے لُٹ لیندا

کِتے عشق دا روگ نہ لا بیٹھیں

تند چرخے پاؤنی بھُل جائیں گی

وچ گلیاں دے رُل کھُل جائیں گی

ایہہ بھار نہ کدھرے چا بیٹھیں

کِتے عشق دا روگ نہ لا بیٹھیں

جگ ہے نشانہ عشق دا

گھر گھر فسانہ عشق دا

منزل ہے گہری عشق دی

وکھری کچہری عشق دی

جنگل وچ ڈیرے عشق دے

عرشاں دے پھیرے عشق دے

منگدا رضا مطلوب دی

سنڑدا اے گل محبوب دی

چھڈدا کسے دا ککھ نئیں

رکھدا عقل نال ویر اے

کتیاں دے چُمدا پیر اے

چمڑا لُہایا عشق نیں

بُلھا نچایا عشق نیں

کِتے عشق دا روگ نہ لا بیٹھیں

بنڑ جھلی، روویں ہسیں گی

راتاں نوں اٹھ اٹھ نسیں گی

سدھ بدھ نہ کدھرے گنوا بیٹھیں

کِتے عشق دا روگ نہ لا بیٹھیں

کھوہے سٹایا عشق نیں

مصرے وچایا عشق نیں

کردا کِتے ایہہ زاریاں

بخشے کِتے سرداریاں

پُٹی زلیخا عشق نیں

لٹی زلیخا عشق نیں

کِتے جِتدا، کِتے ہاردا

کِتے ڈوبدا کِتے تاردا

منہ چُم لیندا دار دا

آگاں چ چھالاں ماردا

پتھر پوائے عشق نیں

دند وی کڈائے عشق نیں

زہراں کسے لئی گھولدا

مونہوں وی کج نئیں بولدا

وکھری نیاز اے عشق دی

وکھری نماز اے عشق دی

سجناں نوں پھردا تولدا

حافظ! ایہہ در در رولدا

کِتے عشق دا روگ نہ لا بیٹھیں

اینے ہیر لئی، زہراں گھولاں نیں

اینے سسیاں سوہنیاں رولیاں نیں

ایہدا کِتے وساہ نہ کھا بیٹھیں

کِتے عشق دا روگ نہ لا بیٹھیں

دنیا توں بچنا پیناں اے

بنڑ کنجری نچنا پیناں اے

ایس عشق توں جان بچا بیٹھیں

کِتے عشق دا روگ نہ لا بیٹھیں

ہنجواں نوں پِینا پیناں اے

مر مر کے جِینا پیناں اے

تُوں نظر نہ کِتے ملا بیٹھیں

کِتے عشق دا روگ نہ لا بیٹھیں

عشق دے خواب دیاں نت نکلن کیتیاں ای تعبیراں

دکھاں درداں والیاں پیریں پاوے عشق زنجیراں

کئی مہینوال تے رانجھے ایس نیں کیتے وانگ فقیراں

لٹیاں نیں ایس عشق نے حافظ کئی سسیاں کئی ہیراں

کِتے عشق دا روگ نہ لا بیٹھیں

ایس عشق دے کولوں بچ کُڑیئے

تینوں حافظ کہندا سچ کُڑیئے

نہ عزت، شان گنوا بیٹھیں

کِتے عشق دا روگ نہ لا بیٹھیں

جِند وختاں وچ نہ پا بیٹھیں

کِتے عشق دا روگ نہ لا بیٹھیں